مبدئياً كلنا بنتفق انه السوشال ميديا صارت جزء أساسي من حياتنا وبتشغل مساحة لا بأس بها من وقتنا.. على صعيد اخر :) لا زالت اللغة الانجليزية محافظة على انتشارها العالمي ... هي تقريباً اللغة الوحيدة اللي جزء كبير من سكان هذا الكوكب بقدرو يتواصلو فيها.. طبعاً ما في غنى عنها, ولازم كل واحد فينا يكون عنده معرفة ولو بسيطة باللغة الانجليزية لانه ما بتعرف الحياة بأي ظروف ممكن تحطك وتضطر للانجليزي :)
Speak & Translate - Traslator
هاد التطبيق بترجم فوري الكلام.. كيف يعني ؟
يعني بتحكي النص بالعربي مثلا وبتختار انه بدك اياه مترجم للانجليزي على فرض.. بإمكانك تحتفظ بالنص المترجم داخل التطبيق .. طبعا بحتوي على 54 لغة .. طريقة سهلة لتتعلم تحكي أي لغة بدك اياها من اللغات الموجودة ..
عماد أبو تركي ,, أستاذ لغة انجليزية من الخليل, فلسطين .. بينشر من خلال الحساب التعليمي المخصص لتعليم وتطوير اللغة الانجليزية كلمات ومصطلحات بتفيدكم كتير بالحياة اليومية .. وكمان بيشرحها وبيعطي أمثلة عليها بطريقة سهلة وواضحة.. بالاضافة للقواعد الاساسية في اللغة الانجليزية وترجمة لفقرات مختارة مع التركيز على اللفظ الصحيح باللهجة الامريكية American Accent .. بالاضافة لحياته اليومية ويومياته مع طلابه ..
Learn English with Roni
English with Imad
Speak English with Mister Duncan
Go natural with Gabby Wallace
TED talks
Seat of the Soul by Gary Zukav
بيحكي عن كيف بتقدر تكون انت المسيطر في حياتك وكيف تعيد تقييم علاقاتك مع الناس اللي حوليك وكيف تتصالح مع نفسك وتحافظ على "سلامك الروحي" من منظور علمي نوعاً ما وفلسفي.. الكتاب ممتع جداً والنص بشدك من أول صفحة لآخر صفحة ...
وعليه.. جمعت بهاي المدونة مصادر من السوشال ميديا رح تساعدكم علشان تقدروا تطوروا لغتكم الانجليزية بأنفسكم .. بالتأكيد هاي بضل لغة مش فيزيا ولا رياضيات .. يعني مش لازم تحفظو قواعد وتعاملو اللغة كإنها معادلة .. فعلياً الممارسة هي افضل طريقة لتعلم اللغة الانجليزية ..بالتالي حاول تعيش اللغة وتفهمها وتحبها عشان تتعلمها وتتقنها :)
تطبيقات للهاتف الجوال Applications
البداية رح تكون لتطيبقات ممكن تنزلوها على جوالكم, رح تساعدكم اما بالترجمة او التعرف على كلمات وحفظها قراءة وكتابة واستماع وحتى لفظ كمان.. رح احط صورة كل تطبيق واسمه عشان تلاقوه بسهولة..
Memrise
تطبيق بساعدك تتعلم كلمات جديدة من خلال القراءة والكتابة واللفظ والاستماع..
فيو أكتر من لغة مش بس اللغة الانجليزية.. الحلو انه مستويات, يعني ما بتنتقل لمستوى اعلى الا لما تتقن مجموعة الكلمات اللي بالمستوى اللي انت فيه.. بس تتمكن منها بتنتقل للمستوى اللي بعده مع مجموعة كلمات جديدة D:
Speak & Translate - Traslator
هاد التطبيق بترجم فوري الكلام.. كيف يعني ؟
يعني بتحكي النص بالعربي مثلا وبتختار انه بدك اياه مترجم للانجليزي على فرض.. بإمكانك تحتفظ بالنص المترجم داخل التطبيق .. طبعا بحتوي على 54 لغة .. طريقة سهلة لتتعلم تحكي أي لغة بدك اياها من اللغات الموجودة ..
TED
من التطيبقات المفضلة عندي ... ممكن تعتبره منصة خطابية .. هو عبارة عن أشخاص بشاركوا العالم قصص من واقع حياتهم وتجاربهم .. في كتير قصص ملهمة ومؤثرة .. طبعاً بيحكو باللغة الانجيليزية وهاي الخطابات او اللقاءات مسجلة وما في مجموعة محددة عالتطبيق.. بمعنى كل فترة بضيفوا فيديوهات جديدة..
Arabic Dictionary - Dict Box
تطبيق خرافي جداً .. هو عبارة عن قاموس.. بس ليش خرافي؟
اولاً بشتغل offline, ومش بس بيعطيك معنى الكلمة , بيعطيك مرادفات الها وبحطها بمثال .. طبعا القاموس عربي-انجليزي و انجليزي- عربي
الاشي التاني الرائع انه مثلاً لو كنت بتعرف لفظ كلمة معينة بس ما بتعرف كتابتها.. بتقدر تحكيها حكي لانه فيو خاصية مايكروفون والقاموس بيعطيك معناها وكل اشي بتعلق فيها..
TOEFL iBT Preparation
لو بتفكر تعمل امتحان التوفل هاد التطبيق رح يساعدك.. معروف انه بيجي بالامتحان مواضيع كتير متنوعة من الاحياء للفلك للتاريخ للتجارة للسياحة .. كل ما كان عندك مخزون كلمات اكتر كل ما تمكنت من الامتحان اكتر.. هاد التطبيق بساعدك تتعلم اكبر عدد ممكن الكلمات والمصطلحات بكتير مجالات..
English Idioms & Phrases
هاد التطبيق برضو لطيف جداً ولمحبي ال idioms :)
ال idioms و ال phrases هي باختصار كلمات او جمل قصيرة ما بناخدها بمعناها الحرفي في سياقات معينة زي مثلاً : "head in the clouds" مش معناها انه حدا راسه بالسما ولا حتى شايف حاله..معناها انك بتتخيل أو بتحلم ..كمان مثال: "put your money where your mouth is" بمعنى انه بكفي حكي وصار الوقت انك "تفعل" :) ..هاي هي فكرة التطبيق بس طبعا الشرح بالانجليزي مش بالعربي بس بالمجمل اللغة بسيطة ومفهومة..
حسابات على Snapchat
التطبيق المنتشر بشكل كتير كبير بين الناس والتطبيق اللي للاسف بنضيع وقت لا بأس به عليه بدون فايدة.. ولكن هاي حسابات لناس رح تساعدك بمجال تعلم اللغة الانجليزية بطريقة مفيدة وسهلة ...رح احط السناب كود لحسابات ناس عرب وأجانب رح يفيدوكم كتير ...
حساب لمجموعة من العرب والاجانب تابعين لنادي تعليمي ,, رح تتعلم معهم اللغة الانجليزية بكل المستويات وبركزو كتير ع موضوع الطلاقة واللهجة اللي هي ال accent ,, بالاضافة لتوضيح امور تانية بتهم المتابعين بس بالانجليزي برضو.
شانن .. أمريكية عاشت فترة طويلة بالخليج ورجعت على أمريكا.. يعني بتتقن اللغة العربية واللغة الانجليزية .. بتشارك المتابعين جزء من حياتها اليومية بالعربي وبالانجليزي بالاضافة لشروحات بسيطة عن كلمات ومصطلحات مستخدمة بشكل يومي وباستمرار بتناقش وبتجاوب على اسئلة الفولورز عن اي اشي بخص الانجليزي ..
حساب متخصص في الحديث عن بعض المواضيع الثقافية ,, من خلال الكلام والنقاش عن هاي المواضيع رح تقدر تسمع اللغة الانجليزية بلفظ ولهجة صحيحة وتتعرف على كلمات ومصطلحات جديدة من خلال المواضيع المطروحة..
حساب تعليمي لصبية خريجة أمريكا.. بتشارك بعض من يومياتها ومن خلال هاي اليوميات بتنشر شروحات بسيطة باللغة الانجليزية وبترجمها للعربي ..
اليوتيوب Youtube
لهواة اليوتيوب .. هاي مجموعة من أفضل القنوات التعليمية والتثقيفية باللغة الانجليزية .. منها لعرب ومنها لأجانب .. وفي منهم قناة للتحضير لامتحان التوفل .. القنوات اللي باللغة الانجليزية في امكانية انكم تحضروا الفيديوهات مترجمة للغة العربية او مع English subtitles يعني الحكي ينعرض كتابة على نفس الفيديو من داخل الفيديو نفسه وهاد اشي بساعدكم تتعلمو الكلام وكلمات جديدة لما تشوفوا الحكي مكتوب.. رح أحط شكل القناة على اليوتيوب واسمها ..والافضل تعملو اشتراك يعني subscribe عشان كل ما تفتحتو اليوتيوب تطلع عندكم الفيديوهات الجديدة اللي بتنشرها كل قناة ....
Learn English with Roni
English with Imad
Speak English with Mister Duncan
Go natural with Gabby Wallace
TOEFL tv
Let's talk
TED talks
A J Hoge
صفحات فيسبوك Facebook pages
وأكيد في للفيسبوك نصيب من هذه المدونة ... البيجات التالية رح تفيدكم أكيد .. يفضل مش بس تتابعوها, اعمولولها كمان see first أو شاهد أولاً مشان كل بوست بنشروه يطلع عندك في أول ال news feed أو يعني اول ما تفتح الفيسبوك .. كل بيج الو طريقته الخاصة بعرض المحتوى التعيليمي باللغة الانجليزية ولكن كلها تتفق بالاسلوب الملفت والبعيد عن التكرار والملل .. هاي البيجات بتساعدك تزيد مخزون الكلمات عندك وفي كمان فيديوهات ومقالات .. يعني بالمجمل كلها رائعة وتستحق المتابعة...
كتب Books
طبعاً لا بد يكون للقراءة نصيب من هذه المدونة .. القراءة وبقصد قراءة الكتب والروايات ,,"من وجهة نظري" اولا بتيجي في مراحل متقدمة من تعلم اللغة الانجليزية,, لانك بتكون متمكن نوعاً ما من اللغة وما رح تواجه صعوبة في قراءة او فهم النص ,, ثانياً: هي غذاء للروح بشكل عام :) وعشان تقرأ كتاب معين وتستمتع فيه حلو تكون معتمد على نفسك .."ولكن" هذا لا يعني انه القراءة مقتصرة فقط على اللي لغته الانجليزية ممتازة .. بالعكس, اذا كنت من النوع اللي بحب يتحدى نفسه ممكن القراءة تنقل مستواك اللغوي نقلة نوعية .. فيما يلي خمس كتب من أفضل الكتب اللي قرأتها في ال 2017 ... متوفرة منها كلها نسخة online في حال ما قدرتوا تحصلو على الكتاب نفسه.. بشكل عام في ناس ما بتحب نسخة النت لانهم ما بستمتعو بالقراءة .. بالنسبة الي معنديش مشكلة بشكل النص لانه المهم محتوى الكتاب وفكرته وهدفه وتأثيره عليي كقارئة ...
Seat of the Soul by Gary Zukav
بيحكي عن كيف بتقدر تكون انت المسيطر في حياتك وكيف تعيد تقييم علاقاتك مع الناس اللي حوليك وكيف تتصالح مع نفسك وتحافظ على "سلامك الروحي" من منظور علمي نوعاً ما وفلسفي.. الكتاب ممتع جداً والنص بشدك من أول صفحة لآخر صفحة ...
Chicken Soup for the Soul by Jack Confield & Mark Hansen
مبدئياً هي سلسلة كتب بتحمل نفس العنوان والمحتوى عبارة عن قصص حقيقية لناس مرت بتجارب صعبة في حياتها وتجاوزتها .. كلها قصص ملهمة ومؤثرة . كل كتاب بحكي عن مجموعة ناس .. مثلا مراهقين .. أمهات .. معلمين .. طلاب .. وهكذا ..
Lean In by Sheryl Sandburg
شيريل هي المديرة التنفيذية لشركة فيسبوك .. بتحكي في كتابها عن الاسباب اللي بتخلي الذكور يشغلو معظم المناصب العليا والمهمة في سوق العمل برغم انه في نسبة كبيرة من الاناث بيحملو شهادات جامعية عليا وبإمكانهم يشغلو أي منصب ويكونو قد المسؤولية .. كمان بتحكي في الكتاب عن كيفية تطوير النساء لمهاراتهم العقلية والابداعية عشان يكون يرقوا لأفضل مستوى انجازي عملي ... وكتير شغلات تانية ضمن هاد الموضوع ..
The Power of Now by Eckhart Tolls
ناوية أرجع أقرأه كمان مرة .. هاد الكتاب رح يرشدك لذاتك وكيف تشوف الجانب الايجابي بكل اشي حوليك .. كيف ممكن تتعامل مع افكارك السلبية وكيف تتخلص منها وتخرج من لحظات ضعفك وانهزامك بشكل أقوى .. مالوش دخل الكتاب بخرافات التنمية البشرية :) رح تقدر تكتشف خلال القراءة انه عندك قوة تتجاوز فيها كتير شغلات انت مستصعبها وانه عندك طاقة ايجابية كبيرة يمكن انت بعدك مش مكتشفها..
الأفلام Movies
Last but not least ..أخيراً وليس آخراً .. من الطرق اللي مقتنعة انها بتطور لغتك الانجليزية بشكل كبير من ناحية سمع وحكي ولهجة وساعدتني أنا شخصياً كتير .. هي الافلام .. اصلا هي كانت من الاسباب اللي حببتني باللغة وخلتني ادرسها .. بداياتي كانت مع افلام ديزني ايام الفيديو زي افلام Swan Princess , Pocahontas, Cinderella .. وبارني طبعاً الراعي الرسمي لطفولتي:)
المهم .. الفيلم يعني في ساعتين بالموضوع .. والافضل لما تختار فيلم يكون الو قصة .. هدف .. معنى . مش فيلم والسلام .. هاي قائمة بأفضل الافلام اللي ممكن تحضرها :) وطبعا انا بفضل الافلام اللي بتكون مقتبسة عن قصة حقيقية او رواية او كتاب ..
رح احط بالاول الافلام المقتبسة عن قصة حقيقية او رواية وبعدين افلام عادية بس تستحق المشاهدة ونبذة بسيطة عن كل واحد .. تقييمي العام لكل القائمة 10/8.5 :) ...
1) Room : مقتبس عن قصة حقيقية عن وحدة بتتعرض للاختطاف وبتنحبس لمدة 7 سنواب داخل غرفة .. بتجيب ولد خلال هاي الفترة وهاد الولد ادراكه لوجود عالم خارج الغرفة اللي انخلق فيها معدوم وما بتسوعب فكرة وجود بشر تانيين غير امه .. قصة الفيلم برويها الطفل من وجهة نظره.. فيلم رائع جداً جداأ
2) Collateral Beauty : مقتبس عن قصة حقيقية .. بيحكي قصة مدير شركة ناجح بيفقد بنته بسبب المرض.. بدخل بحالة نكران للواقع وبصير يكتب رسائل للموت والمرض والحب ويبعتها بالبريد.. اصدقائه عشان يساعدوه بستعينو بممثلين مسرح يجسدو شخصيات الموت والمرض والحب مشان يساعدو يطلع من حالته ..
3) Captain Phillips : مقتبس عن قصة حقيقية .. بحكي قصة سفينة تجارية امريكية بخطفوها قراصنة صوماليين .. بطولة الخرافي توم هانكس .. اللي بحاول طول الفيلم يتعامل مع هاي الكارثة بضبط اعصاب وحكمة عشان ما يخسر السفينة او الطاقم ..
4) Sully : ايضاً بطولة توم هانكس .. مقتبس عن قصة حقيقية .. بيحكي قصة طيار بهبط هبوط اضطراري في نهر هدسون .. ولكن بتعرض للمسائلة القانونية فيما اذا كان فعلا هبوط اضطراري او خطأ من الطيار في تقدير الامور وتعريض حياة الركاب للخطر ..
5) The Terminal : مقتبس عن قصة حقيقية لرجل روسي بسافر لأمريكا وخلال رحلته بتتعرض مقاطعته لانقلاب وتقفد اعترافها الدولي.. بالبداية بنمنع من دخول اميركا لانه جواز سفره ما الو اعتراف.. ولاحقا برفض فكرة يدخل اميركا كلاجئ سياسي.. بعيش في المطار لمدة سنة وبكون صداقات مع الموظفين فيه لحد ما تنحل الامور ويقدر يدخل البلاد بشكل قانوني .. ايضا بطولة توم هانكس..
6) The Davinci Code 7) Inferno 8) Angeles & Demons
هدول الافلام التلاتة مقتبسة عن روايات بنفس الاسم ل دان براون .. والتلاتة ايضا بطولة توم هانكس .. بيحكو عن الديانة المسيحية والرموز والابنية والكنائس والمعابد والقصص اللي وردت في الانجيل سواء الاصلية او اللي تحرفت من خلال تلات جرائم وقعت والسبيل الوحيد لحل القضية هو فك هاي الرموز.. سلسلة رائعة جداً وأداء توم هانكس خرافي ايضاً
9) Hidden Figures : مقتبس عن قصة حقيقية لتلات عالمات راضيات من اصول افريقية امريكية ساعدوا وكالة ناسا في اطلاق اول سفينة فضائية على متنها بشر للفضاء .. بعد معاناة طبعا لانه بكون مرفوض اشتراكهم بالرنامج بسبب لون بشرتهم ..لكنهم بحققو نجاح كبير
10) The Blind Side : مقتبس عن قصة حقيقية بيحكي قصة شب فقير اسود مشرد ما قدر يتلقى التعليم المناسب لحد ما تحتضنه اسرة امريكية من أصل ابيض وبتساعده يغير حياته للافضل ويتعلم وبنضم لفريق كرةالقدم الامريكية وبصير من اعظم اللاعبين في هاي الرياضة..
11) The Freedom Writers : مقتبس عن قصة حقيقية .. وايضا في كتاب بنفس العنوان .. الكتاب والفيلم يبحكو قصة صراع بين معلمة وطلابها اللي جايين من خلفيات عرقية وثقافية مختلفة ومنبوذين وميؤوس منهم من وجهة نظر الادارة التعليمية.. وبتقدر بإصرارها وايجابيتها انها تغير حياتهم للافضل رغم كل التحديات والعقبات اللي بواجهها الطرفين..
12) Brain on Fire: مقتبس عن قصة حقيقية لبنت بتأجل دراستها الجامعية وبتشتغل صحفية وبتكون اصغر صحفية بمكان عملها.. حياتها مستقرة ونوعاً ما مثالية لحد ما بتدهور صحتها وبصيبها مرض بعجز عن تشخيصه الاطباء وبهدد حياتها ومستقبلها لحد ما ييجي طبيب عربي بيحل لغز مرضها وبساعدها على التعافي .. الفيلم ايضا تحول لكتاب ألفته صاحبة القصة الاصلية لنشر الوعي عن مرضها النادر ولتشارك العالم تجربتها قبل واثناء وبعد المرض .
13) The Theory of Everything: فيلم بحكي قصة حياة عالم الفيزياء ستيف هوكنج اللي البعض بوصفه انه اذكى انسان في هاد العصر وقصة المرض المميت اللي بصيبه وتفاصيل تانية عن حياته ..
14) Hacksaw Ridge : مقتبس عن قصة حقيقية عن شاب في الحرب العالمية الثانية بقرر ينضم للحرب كمسعف وبرفض بشكل قطعي كل اشكال العنف والقتل .. بتتعرض حياته للخطر وبرفض الانصياع للاوامر العكسرية وبصير اول عسكري برفض تنفيذ الاوامر العسكرية بتاريخ اميركا العسكري ومع هيك بقدمله الكونغرس ميدالية شرفية لجهوده وشجاعته في ساحة المعركة..
15) Argo : مقتبس عن قصة حقيقية وبحكي قصة ازمة الرهائن الامريكيين في السفارة الامريكية في ايران وكيف تم انقاذهم واعادتهم لاميركا رغم القيود المشددة اللي كانت تهدف للامساك بهم وقتلهم ..
16) The Pursuit of Happiness: مقتبس عن قصة حقيقية والبعض بوصفه انه أحد أفضل أفلام ويل سميث .. بيحكي قصة أب وابنه ومشوار هاد الاب وتحديه لكل الظروف في سبيل تحقيق السعادة لعيلته ..
17) The Imitation Game: مقتبس عن قصة حقيقية لعالم الرياضيات البريطاني آلان تورينج اللي كان الو دور كبير في فك شيفرة "اينجما" الالمانية خلال الحرب العالمية الثانية الامر اللي ساعد على انهاء الحرب وانتصار الحلفاء.. هو الاب الروحي للحاسوب " الكمبيوتر" لانه قدر يفك الشيفرة عن طريق تطوير آلة معقدة تحاكي جهاز الحاسوب اليوم ..
18) A beautiful mind : مقتبس عن قصة حقيقية .. بيحكي قصة عالم الرياضيات العبقري الامريكي جون ناش ..واضع أسس علم الرياضيات في العصر الحديث رغم اصابته بمرض الشيزوفرينيا واللي ضل يعاني منه فترة طويلة , كان يتخيل انه بشتغل مع الحكومة الامريكية .. ولكن قدر يتجاوزه بمساعدة ومساندة زوجته وقدر يحل مسألة رياضية أرقت العلماء فترة طويلة وترشح على هاد الاساس لجائزة نوبل
19) The Shawshank Redemption : مقتبس عن سلسلة روايات اسمها "different seasons"
بيحكي قصة محاسب بيدخل السجن ظلم مدى الحياة بتهمة قتل زوجته.. بكون علاقات صداقة مع السجناء وبساعدهم يحلو مشاكلهم المالية بالتحايل على القانون ومن هون بتبلش حياته الاجرامية ... فكرة الفيلم من وجهة نظري انه جانب الشر موجود بكل انسان ولكن بتفاوت وكل ما انحط الانسان تحط ضغط وانظلم بطفو هاد الجانب عالسطح وبسيطر عليه وهاد اللي صار مع بطل الفيلم ..
20) Forrest Gump : مقتبس عن رواية بنفس الاسم .. بحكي قصة شاب بعاني من اعاقة عقلية وصعوبات تعلم بترفض امه تحطه بمدرسة خاصة عشان ما يشعر بعقدة النقص .. بتحطه بمدرسة عادية وبعاني من المضايقات من طلابها ..لاحقاً بلتحق بالجيش وبشارك بحرب فييتنام وبحصل على وسام الشجاعة من الرئيس لانقاذه حياة خمس جنود ..
*******************
وهون قائمة أفلام عادية ولكن تستحق المشاهدة..
1) The Shack : بيحكي قصة أب انخطفت بنته الصغيرة وانقتلت اثناء رحلة عائلية وبيدخل حالة اكتئاب.. بيصحى بيوم بيلاقي حاله بمكان أشبه ما يكون بالجنة مع تلات اشخاص اللي همي بيجسدو دور الاله والقدر والموت عشان يفهموه الحكمة من اللي صار وكيف يتقبل قدره .. بعض الناس بترفض هاي النوعية من الافلام لانه بأثر عليهم بطريقة مزعجة .. أنا شخصياً أعجبني جداً من ناحية سيناريو وتصوير وأداء .
2) Mother : نفس مبدأ الفيلم اللي فوق .. فيلم بجسد فيه أشخاص الاله والطبيعة وآدم وحوا وابناءهم هابيل وقابيل .. قصة بدء الخلق والخطيئة الاولى ومولد السيد المسيح وكل هاي الرموز البارزة في الانجيل .. التصوير والاداء خرافي.. الفيلم ما فيو موسيقى تصويرية أبدا بعتمد على تعابير وجوه الممثلين وانفعالاتهم ..
3) Gifted: قصة شاب بيربي بنت أخته اللي توفت .. بكتشف بعد فترة انها عبقرية وعندها قدرات اكبر من سنها .. مع هيك بحاول تخليها تعيش حياة طبيعية ولكن جدة البنت بتلاحظ عبقريتها وبتحاول تستفيد منها وبتقرر تحط مخطط لحياتها بفصلها عن عمها ..أداء البنت الصغيرة بهاد الفيلم ملفت ولطيف جداً ..
4) Olympus has fallen 5) White house down
الاتنين تقريبا بيحملو نفس الفكرة اللي هو انقلاب داخل البيت الابيض بهدد أمن ومستقبل الولايات المتحدة .. مع بعض الاختلافات.. أنا بفضل التاني منهم لانه في اثارة أكتر وخصوصا انه فيو بنت صغيرة بكون الها دور كبير في تحويل مجريات الاحداث بطريقة رائعة ..
6) Interstellar: فيلم خيال علمي ولكن أيضا يحتوي على حقائق علمية احيانا.. بيحكي قصة رائد فضاء بضطر يترك بنته للسفر مع طاقم من رواد الفضاء للبحث عن كوكب اخر صالح للحياة البشرية بعد ما تقريبا الارض تدمرت وبطلت صالحة للعيش عليها .. فيلم بجمع الخيال والعلم والفن بطريقة رائعة ..
7) The Hitman's Bodyguard: فيلم اثارة ولكن ضمن اطار كوميدي بيحكي قصة افضل حارس شخصي في العالم بتكلف من قبل صديقته في الانتربول بحماية قاتل محترف .. هاد القاتل مطلوب انه يدلي بشهادته في محكمة العدل الدولية كونه الشاهد
الوحيد في القضية رغم المحاولات المستمرة لتصفيتهم التنين طول الطريق من السجن للمحكمة. خرافي جداً
9) The life of Pi : قصة شاب هندي أهله بيقرروا يهاجروا على كندا .. أثناء الرحلة في المحيط الهندي بتغرق السفينة .. الا انه بينجو على متن قارب نجاة وبيلاقي حاله مع ضبع وحمار وحشي ونمر على نفس القارب وهون بتبلش قصة الصراع من أجل البقاء .. الاشي الملفت بهاد الفيلم انه الوحيد بتاريخ هوليوود اللي بعتمد بشكل كامل على المؤثرات البصرية يعني ولا اشي من اللي بالفيلم حقيقي ولا حتى الحيوانات .. كلها مؤثرات بصرية ..
10) Manchester by the sea : فيلم مؤثر جداً بحكي قصة شاب بيشتغل عامل تصليح بينتقل من مانشستر لبوسطن بعد حاد بفقد فيه زوجته وبنته .. بعيش حالة فوضى وضياع .. بتلقى كمان ضربة لما يتبلغ انه اخوه توفى .. بيرجع على مدينته الام .. مانشستر لدفن اخوه وبلاقي حاله مسؤول عن ابن اخوه اللي ما ضل عنده الا هو .. فيلم بيصور عمق مشاعر الحزن وألم الفقد وكيف لازم الانسان يلاقي القوة ليبلش من جديد ..
11) Colossal : فيلم خيال علمي بيحكي قصة جلوريا العاطلة عن العمل واللي خرجت من علاقة حب فاشلة .. فجأة بصير مصير العالم واقف عليها لما يظهر مخلوق غريب في كوريا الجنوبية بهدد الحياة واللي مرتبط فيها بطريقة ما ..
12) Jack Reacher : ضابط سابق في قوات المارينز .. بتم استعادؤه للتحقيق في جريمة قتل لمشتبه به هو بالاصل اللي طلب من الشرطة الاستعانة في جاك ريتشر لحل القضية .
13) The intern : فيلم كوميدي درامي لطيف بيحكي قصة عجوز أرمل في السبعينات بقرر انه يشتغل كمتدرب في شركة أزياء.. نوعاً ما الو دخل بالتطور التكنولوجي الي صاير بالعالم بس بصير الصديق المقرب لكل الموظفين الشباب بالشركة وبساعد مديرة الشركة اللي برضو بتكون في مقتبل العمر كيف ترتب أولوياتها وتاخد القرارات الصح بخصوصها حياتها وشركتها ..
14) Edge of Tomorrow : فيلم خيال علمي بحكي عن المستقبل .... وليام كيدج جندي ما خاض ولا معركة من قبل بلاقي نفسه محاصر في عملية انتحارية بينتقل فيها .. بطريقة ما برجع بعيش وبرجع نقتل بنفس الطريقة وكل مرة بكتسب مهارات قتال جديدة .. لحد ما يلاقي نفسه مسؤول عن صد هجوم مخلوقات فضائية بتهدد الارض ..
15) The Hunger Games: Mokingjay : الجزء التاني من السلسلة .. بنكمل مع كاتنيس صراعها وثورتها ضد الطبقة اللي مستعبدة شعبها بعد ما اقنعتهم انه القتال هو الحل الوحيد..
16) The Martian: خيال علمي بيحكي قصة رائد فضاء بفقد الاتصال مع زملاؤه على سطح كوكب المريخ ويعتبر في عداد الاموات لحد ما يتلقو اتصال منه انه على قيد الحياة .. بحاول رائد الفضاء يستخدم ذكاؤه ويعيش على سطح المريخ مع التواصل باستمرار مع اصدقائه لحد ما يلاقوا طريقة يرجعوه فيها على كوكب الارض ..
17) I Origins : قصة شاب متخصص في علم الاحياء .. بدرس تطور العين البشرية مع زميلته بالمختبر وبوصلو التنين لاكتشاف في هاد المجال ممكن يأثر ويغير حياة البشر ..
18) Jumanji : فيلم محدث عن القصة الاصلية للفيلم اللي بحكي عن لعبة سحرية اثناء اللعب بتخرج شخصياتها للعالم الحقيقي .. الفيلم المحدث بالعكس .. بيسحب الابطال لداخل لعبة فيديو وكل واحد فيهم بيتحول للشخصية اللي بختارها .. انا لازلت بفضل النسخة الاصلية :) ..
19) The Machinist : بحكي قصة صراع شاب مع نفسه وبدخل حالة اكتئاب بتأثر على كل حياته .. بمضي الفيلم في محاولة الاطباء فهم اللي بعيشه وبحسه في محاولة علاجه وهون بتكون مفاجئة بنهاية الفيلم ...
20) V for Vendetta : بيحكي بالمجمل عن قدرة الشعب على التحرر واحداث تغيير لما يوحدوا صفوفهم .. فيلم بجسد معاناة كل شعوب العالم اللي تحت الظلم وكيف انه الوحدة هي السبيل الوحيد للخلاص والحرية .
ختاماً .. كل ما ورد في هذه المدونة انا متابعته وجمعته وحطيته هون ولكن لا يعني انه ما في الا هاي المصادر او هدول الناس او هاي الافلام ولكن انا " وضعت بين ايديكم " best of the best , واللي تذكرته حتى تاريخ نشر هذه المدونة .. العالم الافتراضي والمعلومات الموجودة على الانترنت وطرق التعليم والاستفادة لا حصر لها ومش ممكن أشملها كلها بمدونة ولا تنتين ولا عشرة .. ولكن أتمنى تلاقوا هون ما يفيدكم ويرضيكم .. و Have a nice life everyone :) ..
